CERITANE MBAH BUYUT SAUBENGE TELATAH BAYU

Telatah Bayu sing keneng dipedhot sesambungan sejarahe ambi merujuk mekare Blambangan. Sedurunge kraton Macanputih ngadeg kelawan retune Prabu Tawang Alun, perujuk kawitane teka Bayu. Ya ring telatah Bayu Prabu Tawang Alun mertapa lan ulih wahyu perlu ngedegaken keraton anyar, saperlu nguweni giliran nyang adhike kang ran Mas Wilabrata dadi ratu ring Kedhawung. Prabu Tawang Alun sabar lan ngalahan, sing tau lara ati nyang adhike kang sing leren-leren nyerintungi iyane. Naming adile Gusti Pengeran sing perlu dirandhu. Ya ring telatah Bayu pisan Mas Wilabrata nemu pati  lan dipetek ring salah sijine puthuk ring Bayu. Sing iku baen, sak abad seteruse ring telatah Bayu kedaden perang gedhe kang kesebut Perang Puputan Bayu.

Dongengane mbah buyut kang nguwati kedaden Perang Bayu keneng diular-ular nyang anak putu. Lan dongenagan iku sampek saiki keneng ditelusr panggonane lan sesambungane ambi sejarah.

Kaya kang ditulis ambi para ahli sejarah kang nganggo dhasar sumber primer cathetane VOC kang ditulis ring markas kompeni ring Bayu, kantor VOC ring Ulupampang kang dikumpulaken ring buku de Opskomst lan diringkes ambi C. Lekkerkerker, nyeritakaken ga prajurit Bayu kang dipimpin ambi Pangeran Jagapati nerapaken perang gerilya kelawan nggawe pelengan-pelengan kang mateni rupa juglangan kang akeh sunggrake kang diarani sungga. Kerana sungga iki pasukan kompeni kang nganggo bedhil lan meriyem kalah melayu sipat kuping.

Nurut ceritane mbah buyut kala iku wong Bayu perang kelawan nggawe sumur. Akehe puluhan sampek atusan. Arane sumur upas. Sumur kang bisa mateni, sumur kang ana racune. Serang akehe sumur ring palagan perang Bayu, panggonan sumur-sumur upas iku saiki diarani Desa Sumur. Teka desa Sumur sampek nyang Songgon sampek saiki mageh akeh sisa-sisane sumur upas iku. Tandha-tandhane, sumur-sumur iku sing keneng diurug nganggo lemah. Angger diurug lemahe ambles.jaman bengen akeh mbah-mbah kang nemokaken pelor lan kendhaline jaran ring njerone sumur-sumur iku. Pantesane baen pelor lan kendhaline jaran iku duweni pasukane VOC. Polahe kang duwe senjata bedhil nganggo pelor ya pasukane Landa. Semono uga kendhaline jaran. Waktu iku kaya ring dhokumene VOC pasukane VOC nyerang Bayu kelawan nggawa kereta kang isine mimis, lan nunggang jaran. Kadhung perajurit Bayu kang wis ngerti nyang kahanan palagan kang rapet wit-witan sing perlu nganggo jaran kang malah nyerimpedi. Prajurit Bayu kaya kang diceritakaken dokumen VOC perang nganggo senjata tulup lan pelencatan teka wit siji nyang wit liyane. Perajurit Landa kang sing paham nyang palagan, pasrah nerima kalah nalika prajurit Bayu perang kaya wong memengan, prajurit Landa dienggo amik-amik diuntal malang.

sumber : http://basausing.wordpress.com

ring kampung isun ono pisan kang aran sumur ikay…wong deso ngarani “sumur gemuling” angger wes di urug lemah ambles terus…..

sumur-sumur ini sampai sekarang masih ada dan menjadi saksi bisu sejarah.

Post a comment or leave a trackback: Trackback URL.

Komentar

  • olron lare osing  On Februari 21, 2013 at 8:30 am

    Bingen magih jamane isun lan kakang2 isun sak duluran magih podho cilik-cilik, bapak tau ceritho sakwise kalah perang (puputan bayu) poro penggede/bangsawan belambangan akeh hang dihukum pancung lan endyase di tancep’aken ring pucuk’e tombak lan dijejer ring pinggire dyalan sampek pirang2 dino lawase. Tancepan endyas mau buru dipendhem serto wis ono udyan angin hang guuwedik hang lawase ono seminggu.Mbyah buyut hang podho keplayu mergo kalah perang (puputan bayu) lan diuber-uber ambi londho (VOC), terus podho mlebu sengidyan ring alas “Nggendong” hang lokasine kiro2 ning daerah Banyuwangi hang pinggir kidul kulon (pesanggaran … ?).Mbyah buyut iku mau terus ngelakoni tirakat lan “nyiluman/moksa” (menghilang dari peredaran) kelawan ninggalaken sak wujude sumur/sumberan hang dijogo macan gembong seruni lan ono 2 uwit klopo gading lan wringin kuning ( iku sak elinge isun ring ceritane bapak) lan ditutupi watu kang gedhe, mbesuk-mbesuk’e hang biso nemokaken sumberan iku lan kuwat mbukak watu yo mung salah siji soko anak puthune lanang hang duweni “kendit” (pertanda lahir yg berupa kulit perut berwarna agak hitam yg melingkar seperti stagen) lan duweni ilyat/lidah hang belang………(magih ono sambungane lur)

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: